హెల్మెట్‌ లేకుండా డ్రైవింగ్‌, రాంగ్‌ రూట్‌లో రావడం, సిగ్నల్‌ జంపింగ్‌, అతివేగం వంటి తప్పిదాలు చేసి చలాన్ల నుంచి తప్పించుకోడానికి వాహనదారులు అడ్డదారులు తొక్కుతున్నారు. అందుకోసం ప్రభుత్వ, ప్రైవేట్‌ విభాగాల్లో పనిచేసే వారు వాహనాలపై తాము పనిచేసే విభాగానికి సంబంధించి స్టికర్లను అడ్డగోలుగా అంటిస్తున్నారు. దాంతో కొన్ని సందర్భాల్లో వెహికిల్‌ నంబర్‌ సరిగ్గా కనిపించడం లేదని ట్రాఫిక్‌ పోలీసులు చెబుతున్నారు. హైకోర్టు మార్గదర్శకాల ప్రకారం… నంబర్‌ ప్లేట్‌పై నంబర్‌ తప్ప ఎలాంటి రాతలూ ఉండొద్దు.
నంబర్‌ ప్లేట్లపై దృష్టి
నగరంలో చోరీలు, మొబైల్‌, చైన్‌స్నాచింగ్‌లు… అక్కడక్కడా జరిగిన హత్యల్లో నిందితులు ఉపయోగించిన వాహనాల నంబర్‌ ప్లేట్లను టాంపరింగ్‌ చేసినట్లు విచారణలో పోలీసులు గుర్తిస్తున్నారు. చాలాచోట్ల నేరస్తులు ఒకే నంబరును ఒకటికి మించి వాహనాలకు వాడుతున్నారు. ఈ నేపథ్యంలో నెంబర్‌ ప్లేట్లపై ట్రాఫిక్‌ పోలీసులు దృష్టి సారించారు. స్పెషల్‌ డ్రైవ్‌ చేపట్టి స్టికర్లను తొలగిస్తున్నారు.
ముందుగా ‘పోలీస్‌’ స్టికర్లే…
స్టికర్ల తొలగింపు కార్యక్రమంలో భాగంగా ముందుగా పోలీస్‌ అని రాసిన స్టికర్లను తొలగిస్తున్నట్లు ట్రాఫిక్‌ ఉన్నతాధికారులు తెలిపారు. పోలీసు శాఖలో వివిధ విభాగాల్లో పని చేస్తున్న వారిలో చాలా మంది తమ వ్యక్తిగత వాహనాలపై పోలీస్‌ అనే స్టికర్‌ను అంటించుకుంటున్నారు. అలాంటి వాహనాలను గుర్తించి స్టికర్లు తొలగిస్తున్నారు. సొంత వాహనాలపై పోలీస్‌ అని స్టికర్‌ను అంటించుకోవడం చట్టవిరుద్ధమని, అలాంటి స్టికర్లను తొలగించేందుకు స్పెషల్‌ డ్రైవ్‌ చేపట్టామని అడిషనల్‌ సీపీ ట్రాఫిక్‌ అనిల్‌కుమార్‌ తెలిపారు. ఈ నెల 15, 16 తేదీల్లో నిర్వహించిన స్పెషల్‌ డ్రైవ్‌లో పోలీస్‌ స్టికర్‌ పెట్టుకున్న 104 మందిపై కేసులు నమోదు చేశారు. మరో 147 వాహనాలకు స్టికర్లను తొలగించారు. ట్రాఫిక్‌ నిబంధనలను ఉల్లంఘించిన వారెవరైనా ఉపేక్షించేది లేదని, ఈ ఏడాదిలో ఇప్పటివరకు 243 పోలీసు వాహనాలపై చలాన్లు విధించామని అనిల్‌కుమార్‌ తెలిపారు. వాహనాలపై ప్రెస్‌, అడ్వకేట్‌, డాక్టర్‌, ఆర్మీ, పోలీస్‌ అనే స్టికర్లతోపాటు వివిధ శాఖల్లో పని చేస్తున్న ఉద్యోగులు తమ శాఖల పేర్లను రాసుకోవద్దన్నారు.
నంబర్‌ ప్లేట్ల ట్యాంపరింగ్‌
కొందరు నంబర్‌ ప్లేట్ల ట్యాంపరింగ్‌ కూడా చేస్తున్నారు. నంబర్‌ సరిగ్గా కనిపించకుండా, లేదా ప్లేట్‌ను టాంపరింగ్‌ చేయడం వంటి చర్యలతో ట్రాఫిక్‌ అధికారులను బోల్తా కొట్టించే ప్రయత్నాలు చేస్తున్నారు. అలాంటి వారిపై అధికారులు గతంలో కఠిన చర్యలు తీసుకున్నారు. ట్యాంపరింగ్‌ చేసిన వాహనదారుల పని పట్టి వారి నుంచి అధిక మొత్తంలో జరిమానా వసూలు చేశారు. రిజిస్ట్రేషన్‌ నంబర్‌ సక్రమంగా రాయకపోవడం, నంబర్‌ ప్లేట్‌పై ఇష్టానుసారంగా రాతలు రాయడం, నంబర్‌ సరిగ్గా కనిపించకుండా తుడిచేయడం, నంబర్‌ ప్లేట్‌ను మలిచి నెంబర్‌ సరిగా కనపడకుండా చేయడం ఇవన్నీ చట్టరీత్యా నేరాలే. ఇలాంటి చర్యలకు పాల్పడుతున్న వాహనదారులపై ట్రాఫిక్‌ పోలీసులు ఉక్కుపాదం మోపుతున్నారు. గత ఏడాది కాలంలో నంబర్‌ ప్లేట్లు ట్యాంపరింగ్‌ చేసిన 70వేలకు పైగా వాహనాలపై చర్యలు తీసుకున్నారు.
The post హైదరాబాద్‌లో వాహనదారులకు హెచ్చరిక.. స్టికర్‌ ఊడిపోద్ది..! పోలీసు పేరు ఉంటే సీజ్. appeared first on DIVYAMEDIA.
from DIVYAMEDIA http://bit.ly/2Gsfrxf
No comments:
Post a Comment