దేశంలో టెలిఫోన్‌ సేవలను ప్రజలకు చేరువచేసిన బీఎస్‌ఎన్‌ఎల్‌ (భారత్‌ సంచార్‌ నిగం లిమిటెడ్‌) ప్రైవేటు టెలిఫోన్‌ సేవల కంపెనీలతో పోటీ పడలేక వెనుకడుగు వేస్తోంది. ప్రైవేటు కంపెనీలకు దీటుగానే ఆఫర్లను అందిస్తున్నా…. వినియోగదారులకు తమ కంపెనీ సిమ్‌లను అందించలేకపోతోంది. ప్రైవేటు సంస్థలు పోటీలు పడి వినియోగదారులను ప్రతి నెలా పెంచుకుంటూ ఉండగా… బీఎస్‌ఎన్‌ఎల్‌ మాత్రం రోజు రోజుకు తమ వినియోగదారులను పెంచుకోలేకపోతోంది. దీనికి తోడు ప్రైవేటు కంపెనీల మాదిగిరిగా ఆఫర్లను ప్రచారం చేసుకోలేకపోగా… టవర్ల నిర్మాణాలు కూడా ప్రభుత్వ నిబంధనల మేరకు ఉండడంతో పాటు 4జీ సేవలకు సంబంధించి ఇప్పటి వరకు టవర్ల నిర్మాణమే చేపట్టకపోవడంతో తరచూ నెట్‌వర్క్‌ సమస్యలను ఎదుర్కొంటోంది. దీన్ని పరిష్కరించుకునేందుకు అధికారులు కూడా చర్యలు చేపట్టకపోవడం గమనార్హం.
అడ్డగోలుగా ప్రైవేటు కంపెనీల టవర్లు
కేంద్ర టెలికాం సంస్థ నిబంధన ప్రకారం బీఎస్‌ఎన్‌ఎల్‌ తమ టవర్లను ఎంత పరిధి వరకు వినియోగిస్తోందో అంతవరకే ఉపయోగిస్తుండగా… ప్రైవేటు కంపెనీల టవర్లు మాత్రం నిబంధనలకు విరుద్దంగా అడ్డగోలుగా ఏర్పాటు చేస్తున్నారు. పర్యావరణానికి ఇబ్బందులు కలగకుండా… టవర్ల నిర్మాణాలు చేపట్టాలని టెలికాం సంస్థ నిబంధనలు చెబుతుంటే.. అనుకున్నదానికంటే ఎక్కువే టవర్లను ప్రైవేటు కంపెనీలు ఏర్పాటు చేస్తుండడం గమనార్హం. టవర్ల నుంచి సెల్‌ఫోన్లకు అందే నెట్‌వర్క్‌ రేడియేషన్‌ను కూడా అధిక మొత్తంలో వదులుతుండడంతో ఆయా నెట్‌వర్క్‌ కంపెనీల నెట్‌వర్క్‌ స్పీడ్‌ రావడంతో వినియోగదారులు వాటిపైనే ఎక్కువ ఆసక్తి చూపిస్తున్నారు.
బ్రాడ్‌బాండ్‌ సేవల్లో మొదటి స్థానం
ల్యాండ్‌లైన్‌, బ్రాడ్‌బాండ్‌ సేవల్లో మాత్రం బీఎస్‌ఎన్‌ఎల్‌ ముందుండడం విశేషం. ప్రైవేటు నెట్‌వర్క్‌ల కంటే బ్రాడ్‌ బాండ్‌ సేవలు తక్కువ ధరకే రావడంతో పాటు ఇంటర్‌నెట్‌ సేవలు వేగంగా ఉండడంతో వినియోగదారులు వీటికోసం బీఎస్‌ఎన్‌ఎల్‌కు దరఖాస్తుల వెల్లువలా వస్తున్నాయి. నెలకు కనీసం 500 మంది వరకు ల్యాండ్‌లైన్‌, బ్రాడ్‌బాండ్‌ సేవలను వినియోగించుకునేందుకు దరఖాస్తులు చేసుకుంటున్నారని బీఎస్‌ఎన్‌ఎల్‌ అధికారులు చెబుతున్నారు. దీనికి తోడు సేవలలో సమస్యలు వస్తే…బీఎస్‌ఎన్‌ఎల్‌ ఉద్యోగులు బాధ్యత తీసుకుంటుండడం, ప్రైవేటు కంపెనీలు ఇందులో వెనుకబడి ఉండడం కూడా బీఎస్‌ఎన్‌ఎల్‌కు కలసి వస్తోంది.
4జీ సేవలు కలేనా..?
జిల్లాలో అన్ని ప్రైవేటు నెట్‌వర్క్‌లు పెద్ద ఎత్తున 4జీ సేవలను అందిస్తుండగా.. 4జీ సేవలు వచ్చి సంవత్సరాలు గడుస్తున్నా బీఎస్‌ఎన్‌ఎల్‌ ఇప్పటికీ ఒక టవర్‌ నిర్మాణం కూడా చేపట్టలేదు. దీనిపై ఉన్నతాధికారులు సమీక్షా సమావేశాలు నిర్వహిస్తున్నా… టవర్ల నిర్మాణం జరగలేదు. జిల్లాలో మొదట 3జీ సేవలను ఏర్పాటు చేసినప్పుడు బీఎ్‌సఎన్‌ఎల్‌ ముందుండేది. అనంతపురం, పుట్టపర్తి ప్రాంతాలలో వీడియోకాల్‌లో మాట్లాడుకునేందుకు మొదట ఏర్పాటు చేసింది బీఎస్‌ఎన్‌ఎల్‌ కంపెనీనే. అయితే 4జీ సేవలు కూడా ముందస్తుగానే రావడంతో 3జీ సేవలు వెనుకబడిపోయాయి.
వినియోగదారులను పెంచుకుంటాం
బ్రాడ్‌బాండ్‌, ల్యాండ్‌లైన్‌ సేవల్లో మొదటి స్థానంలో ఉన్నాం. 4జీ సేవలకు సంబంధించి ఇతర ప్రైవేటు కంపెనీలతో ఖచ్చితంగా పోటీ పడతాం. అయితే బీఎస్‌ఎన్‌ఎల్‌ కంపెనీ అంతటి నెట్‌వర్క్‌ సేవలు, రీచార్జ్‌ ఆఫర్లు, వినియోగదారులకు సేవలు ఏ కంపెనీ కూడా చేయలేదు. ఇప్పటికీ కనీసం నెలకు వెయ్యి మంది వరకు వినియోగదారులను చేర్చుకుంటున్నాం. వినియోగదారులకు అన్ని ఆఫర్లు తక్కువ ధరకే కావాలంటే బీఎస్‌ఎన్‌ఎల్‌లో మాత్రమే సాధ్యమవుతుంది.
-బాలగంగాధర్‌, ఏజీఎం, బీఎస్‌ఎన్‌ఎల్‌
The post ఆఫర్లలో బెస్ట్‌… సేవల్లో వరెస్ట్‌.. ఇదీ బీఎస్‌ఎన్‌ఎల్‌ పరిస్థితి, దీంతో appeared first on DIVYAMEDIA.
from DIVYAMEDIA http://bit.ly/2ZF0uzt
No comments:
Post a Comment