జూనియర్ ఎన్టీఆర్ మామ చేసిన వ్యాఖ్యలకు కౌంటర్ ఇచ్చిన నారా రోహిత్

సీఎం చంద్రబాబు తన తమ్ముడు రామ్మూర్తి నాయుడిని పట్టించుకోకుండా దూరం పెట్టారంటూ వైసీపీ నేత, జూనియర్ ఎన్టీఆర్ మామ నార్నె శ్రీనివాసరావు చేసిన ఆరోపణలపై యువ నటుడు నారా రోహిత్ స్పందించారు. స్వార్థ రాజకీయ ప్రయోజనాల కోసం తమ మధ్య విభేదాలు సృష్టించొద్దంటూ బహిరంగ లేఖ విడుదల చేశారు. ఐదు కోట్ల ఆంధ్రప్రదేశ్ ప్రజలను ఏ విధంగా చూసుకుంటున్నారో.. తమ కుటుంబాన్ని కూడా తన పెదనాన్న అదే విధంగా చూసుకుంటున్నారని కౌంటర్ ఇచ్చారు. నారా రోహిత్ లేఖలో ఏముందంటే..

నారా అనే పేరును రాష్ట్ర అభివృద్ధికి బ్రాండ్‌‌గా మార్చడంలో ముఖ్యమంత్రివర్యులు, మా పెద్దనాన్న శ్రీ చంద్రబాబు నాయుడు గారి కృషి అభినందనీయం. రామలక్ష్మణుల్లా కలిసి ఉండే మా పెదనాన్న, మా నాన్న(రామ్మూర్తి నాయుడు) మధ్య విభేదాలున్నాయంటూ వ్యాఖ్యానించడం బాధాకరం. మీ స్వార్థ రాజకీయ ప్రయోజనాల కోసం అన్నదమ్ముల మధ్య విభేదాలు సృష్టించొద్దు. నారా పేరును నిలబెట్టడానికి మా కుటుంబం నుంచి ఒక్కరు చాలు. కనుకనే మేమంతా క్రియాశీలక రాజకీయాలకు దూరంగా ఉన్నాం. మీ రాజకీయ ప్రయోజనాల కోసం మా కుటుంబంపై, మా మధ్య ఉన్న బంధంపై బురద చల్లకండి. రాష్ట్ర ప్రజలతో పాటు నారా కుటుంబ సభ్యులు కూడా చంద్రబాబు నాయుడు గారిని ఆదర్శంగా తీసుకుని వారి అడుగు జాడల్లో నడుస్తారు. నాలుగు దశాబ్దాల క్రితమే సమాజ అభివృద్ధి కోసం మా ఆస్తులను పాఠశాలలకు, పంచాయతీ భవనాలకు ఇచ్చామనే విషయాన్ని మరిచిపోకండి. మాకు రాష్ట్ర అభివృద్దే ముఖ్యం. పెదనాన్న మా కుటుంబాన్ని నిర్లక్ష్యం చేశారన్న వాదన నూటికి నూరుపాళ్లు అవాస్తవం, అసత్యం.

రాత్రింబవళ్లు శ్రమించి 5 కోట్ల ఆంధ్రప్రదేశ్‌ ప్రజలను ఏవిధంగా చూసుకుంటున్నారో.. మమ్మల్ని అదేవిధంగా చూసుకుంటున్నారు. ఎంపీ పదవి కోసం సొంత బాబాయి మీదనే చేయి చేసుకున్న చరిత్ర వైఎస్‌ కుటుంబానిది. మాకు పదవులు ముఖ్యం కాదు. మాకు అటువంటి నీచ చరిత్ర అవసరం లేదు. కోర్టులు, జైళ్ల చుట్టూ తిరిగే మీకేం తెలుసు కుటుంబ బాంధవ్యాల విలువ? ప్రతి సంవత్సరం మాతో కలిసి సంక్రాంతి పండుగ జరుపుకుంటున్నారు. ముఖ్యమంత్రిలా కాకుండా ఒక కుటుంబ పెద్దగా గడుపుతున్నారు. మా అందరికీ ఇవ్వవలసిన ప్రాధాన్యత ఇస్తున్నారు. మా నాన్న ఆరోగ్య పరిస్థితి బాగోలేదు కనుకనే ఆయన ఇంటికే పరిమితమయ్యారు. రాజకీయంగా చంద్రబాబు నాయుడు గారిని ఎదుర్కోలేకనే.. కుటుంబ సభ్యులపై, వారి వ్యక్తిగత విషయాలపై అసత్య ప్రచారం చేస్తున్నారు. నారా కుటుంబంలో చీలికలు మనస్పర్థలు తీసుకొచ్చి రాజకీయ లబ్ది పొందాలనుకోవడం మీ దివాళా కోరు తనానికి నిదర్శనం.
     – మీ
                                                                                                                                                           నారా రోహిత్

The post జూనియర్ ఎన్టీఆర్ మామ చేసిన వ్యాఖ్యలకు కౌంటర్ ఇచ్చిన నారా రోహిత్ appeared first on DIVYAMEDIA.

from DIVYAMEDIA https://ift.tt/2U4hMq5